چێنەر: سێبەری شمشێرەکان (تێگەیشتن لەئیسلام) به‌شی دووهه‌م

چێنەر: سێبەری شمشێرەکان (تێگەیشتن لەئیسلام)

به‌شی دووهه‌م

بۆ زیاتر ئاشنا بون به‌ ئاین و مێژوی ئیسلام زۆر پێویسته‌ به‌ كورتی باسی ژیان و ڕه‌چه‌ڵه‌كی عه‌ره‌ب بكه‌ین و بزانین ئه‌م نه‌ته‌وه‌ له‌ كوێوه‌ هاتوون، هه‌روه‌ها سروشت و ژیانیان چۆن بردۆته‌ سه‌ر پێش ئیسلام و پاش ئیسلام. چونكه‌ نه‌ته‌وه‌ی عه‌ره‌ب به‌ خاوه‌نی سه‌ره‌كی و بنچینه‌ و بڵاوكه‌ره‌وه‌ی ئیسلام دائه‌نرێت. به‌ زانینمان له‌ مێژوی ئه‌م نه‌ته‌وه‌ ئه‌توانین زیاتر ئاینه‌که‌ شیبکه‌ینه‌وه‌ و له‌ که‌سایه‌تی په‌یامبه‌ره‌که‌ی تێبگه‌ین.

بێگومان بۆ هه‌مو ڕوداوێك چوارده‌وره‌ كاریگه‌ری خۆی هه‌یه‌، په‌یامبه‌ری ئیسلام ناوی "موحه‌مه‌دی کوری عبدالله"یه‌‌ كه‌سێكی عه‌ره‌به‌ و له‌ چوارچێوه‌ی عه‌ره‌بستانه‌وه‌ ئاینه‌كه‌ی په‌ره‌یسه‌ندوه‌ تا گه‌یشتۆته‌ باكوری ئه‌فریكا و ئاسیا و ته‌نانه‌ت ئه‌ورپا و ئه‌مریكاش به‌ رێژه‌یه‌كی دیاریکراو.

1.1 پێش سه‌رهه‌ڵدانی ئاینی ئیسلام

پێش ئه‌وه‌ی ئاینی ئیسلام له‌ ناوچه‌ی عه‌ره‌بستان سه‌ر‌هه‌ڵبدات، عه‌ره‌بی ئه‌و کات له‌سه‌ر هیچ ئاینێکی تاکخوایی نه‌بون به‌لکو هه‌ر تیره‌یه‌ک بتێکی خۆی هه‌بو تا خۆی پێبسپێرێ. کاریگه‌ری ژیانی بیابان ئاشنای کردبون تا له‌ جوله‌ی هه‌میشه‌دابن له‌ نێوان بیابان و ده‌ره‌وه‌ی دورگه‌ی عه‌ره‌بی بۆ ئه‌وه‌ی به‌دوای بژێوی خۆیان بکه‌وه‌ن، ئینجا چ به‌ بازرگانی بوبێت یان به‌ ڕێگری له‌ کاروانه‌کانی بازرگانی بوبێت.

1. 1. 1 ره‌چه‌ڵه‌كی عه‌ره‌ب

عه‌ره‌ب نه‌ته‌وه‌یه‌که‌‌ له‌ ره‌چه‌له‌کی سامییه‌کانه‌وه‌‌ واته‌ له‌ نه‌وه‌ی "سامی كوری نوح" هاتووه‌ و‌ به‌ ناوچه‌ی دوورگه‌ی عه‌ره‌بیدا بڵاوبونه‌ته‌وه‌.

به‌پێی سه‌رچاوه‌ی "ابن قتیبة‌" له‌ كتێبی (المعاریف لابن قتیبة‌) و "ابن هشام" له‌ كتێبی (السیریة‌ النبویة‌) نوح سێ كوری ئه‌بێ به‌ناوی (حام، سام، یافث). سامیش دوو كوری ئه‌بێ ( ارم، ارفخشذ).

به‌ پێی سه‌رچاوه‌ی "ابن قتیبة"‌، "یعرب" یه‌که‌م که‌س بووه‌ به‌ عه‌ره‌بی قسه‌ی کردووه‌ له‌ ناوچه‌ی یه‌مه‌ن جێنیش ئه‌بێ، كوری(قحطان كورى عابر كورى شالخ كورى أرفخشذ كورى سام كورى نوح)ه.

ئه‌و عه‌ره‌بانه‌ی له‌ناوچه‌ی مه‌ککه ‌جێنیش ئه‌بن له‌ نه‌وه‌ی "جرهم" ئه‌بن كه‌ ئه‌بێته‌ كوره‌ مامی "یعرب". له‌سه‌رتا له‌ ناوچه‌ی یه‌مه‌ن ئه‌بێ و پاشان كۆچ ده‌کات بۆ مه‌ککه، كه‌ كوری(یقطن كورى عابر كورى شالخ كورى أرفخشذ كورى سام كورى نوح)ه.

هه‌ر له‌هه‌مان سه‌رچاوه‌دا باسی نه‌وه‌ی ئیبراهیم ئه‌كات به‌ره‌چه‌له‌ك ئه‌گاته‌وه‌ سامی كوری نوح كه‌ كوری ( تارخ(ازر) كورى ناحور كورى أسرغ(ساروغ) كورى أرغوا(راعوا) كورى فالغ كورى عابر(عبیر) كورى شالخ كورى أرفخشذ كورى سام كورى نوح)ه

له‌ ڕه‌چه‌له‌كی (جرهم و یعرب)دا وا ده‌رده‌كه‌وێ "عابر" كورێكی تری هه‌بووه‌ ناوی "فالغ" بووه‌ كه‌ ئه‌بێته‌ بابه‌ گه‌وره‌ی ئیبراهیم.

به‌ پێی سه‌رچاوه‌ی ابن هشام عه‌ره‌ب هه‌ر هه‌موویان له‌ نه‌وه‌ی (اسماعیل و قحطان)ن، خه‌لكی یه‌مه‌ن بون، ئه‌لێن قحطان كوری "اسماعیل"ه‌. "اسماعیل"یش به‌ باوكی عه‌ره‌ب دائه‌نرێت!

ئه‌وه‌ی زۆر له ‌سه‌رچاوه‌ عه‌ره‌بیه‌كان تێبینی ئه‌كه‌ین زیاتر باسی ڕه‌چه‌ڵه‌كی عدنان ئه‌كرێ كه‌ ڕه‌چه‌ڵه‌یه‌كی عه‌ره‌بیه‌ و په‌یامبه‌ریش ئه‌گه‌رێته‌وه‌ بۆ نه‌وه‌ی "عدنان" به‌ڵام زۆر له‌ مێژوناسانی عه‌ره‌بی بیرو بۆچوونی جیاوازیان هه‌یه‌ له‌سه‌ر بابو باپیرانی.

هه‌ندێكیان ئه‌لێن" عدنان (كورى أدد كورى یحثوم كورى مقوم كورى ناحور كورى تارخ كورى یعرب كورى یشجب كورى نابت كورى اسماعیل كورى ابراهیم)"ه.

هه‌ندێكیان تریان ئه‌لێن" عدنان (كورى أدد كورى انخب كورى أیوب كورى قیدار كورى اسماعیل كورى ابراهیم)ه".

هه‌ندێكیان تریان ئه‌لێن" عدنان (كورى مبدع كورى مبیع كورى أدد كورى كعب كورى یشجب كورى یعرب كورى الهمیسغ كورى قیدار كورى اسماعیل كورى ابراهیم)ه".

عدنان دوو كوری ئه‌بێ به‌ ناوی ( معد و عك)

"معد"یش هه‌شت كوری ئه‌بێ كه‌ چواریان زانراوه‌ به‌ ناوی ( قضاعة‌، ایاد، قنص و نزار)

"قضاعة"‌ له‌ ناوچه‌ی "یه‌مه‌ن" و "حمیر" نیشته‌جێ ده‌بێ.

"قنص" ئه‌بێته‌‌ سه‌رۆكی نه‌وی (ال منذر)، پاشای "حیرة"‌ له‌و نه‌وه‌یه ئه‌که‌وێته‌وه‌‌.

له‌ "ایاد" نه‌ته‌وه‌ی(ثقیف) ئه‌که‌وێته‌وه‌‌.

"نزار" سێ كوری ده‌بێ به‌ناوی (مضر، ربیعة‌، أنمار)

ئه‌و هۆزه‌ عه‌ره‌بیانه‌ی زیاتر ناسراون و ناویان تۆمار كراوه‌ هه‌ر هه‌مویان ئه‌گه‌رێنه‌وه‌ بۆ بابه‌ گه‌وره‌ی "نزار"، چونكه‌ په‌یامبه‌ری ئیسلام به‌ 19 پشت ده‌گه‌رێته‌وه‌ بۆ ئه‌و و زیاتر به‌ هۆی مانه‌وه‌ی ئیسلام و گه‌شه‌ سه‌ندنی ئیسلام ناویان ماوه‌ته‌وه‌. ئه‌گه‌رچی زۆر سه‌خته‌ له‌ مێژوی پێش په‌یامبه‌ر ورده‌کاری ته‌واومان هه‌بێ چونکه‌ به‌پێی سه‌رچاوه‌ی "طبري" کاتێك په‌یامبه‌ر کۆچ ئه‌کات بۆ "مه‌دینه"‌ یه‌که‌م فه‌رمان که‌ ده‌ریده‌کات به‌روار دانانه واته‌ که‌سێک مێژوی پێش ئیسلامی نه‌ نوسیبۆوه‌‌‌. ‌هه‌ندێك ئه‌ڵێن یه‌که‌مین که‌س له‌ ئیسلام به‌رواری دانابێت له‌سه‌رنامه‌کان "عمری کوری خه‌تاب"ه‌. هه‌رچۆنێک بێت ئه‌وه‌ی ئێمه‌ له‌سه‌ری ئه‌نوسین و شیکاری ئه‌که‌ین پشت ئه‌به‌ستین به‌سه‌رچاوه‌ باوه‌ڕپێکراوه‌کانی ئیسلام و من ته‌یدا لێپرسراو نیم!

1. 1. 2 خه‌سله‌تی عه‌ره‌ب پێش ئیسلام

له‌ پێش ئیسلام، عه‌ره‌ب به‌ نه‌ته‌وه‌یه‌كی زۆر توندڕه‌و ‌و بێ به‌زه‌ی ناسراو بوه‌. هه‌ندێكیان پیشه‌یان رێگری كاروانه‌كان بوه به‌ جۆرێک‌ پیاوه‌كانیان كوشتوه‌ و ژنان و ده‌ستكه‌وته‌ ماڵیه‌كانیان بردوه‌ بۆ خۆیان. ژنه‌كانیان كردوه‌ به‌ كه‌نیزك و له‌ بازاری کۆیله‌" سوق الرقیق" فرۆشتویانن، ئه‌م ناوه‌ له‌ (رق) هاتوه‌ واته‌ كۆیله‌. ئه‌و بازاره‌ به‌ بازارێكی جولاوی عه‌ربی ناسراوه‌ بووه‌ كه‌ كڕین و فرۆشتنی كۆیله‌ی زۆری تێدابوه‌.

لای چه‌ند‌ هۆزێكی عه‌ره‌بی بێ به‌زه‌یان هێنده‌ ڕاده‌ به‌ده‌ر بو‌ ته‌نانه‌ت كچه‌كانی خۆیان زینده‌چال ده‌كرد چونكه‌ زۆر گران بوه‌ كچێك بتوانێت بژێوی خۆی دابین بكات چونکه‌‌ هه‌رگیز پیاو پله‌ یه‌ك بوه‌ و ژن ته‌نها له‌ ڕێگای كه‌نیزك و هاوسه‌ری له‌ لایه‌ن ئه‌و هۆزانه‌ ئه‌ژیان. هۆی دووه‌میش ژن سوك بوه‌ تاوه‌کو عه‌یبدار و له‌كه‌دار نه‌بن بۆیه‌ كچه‌كانی خۆیان ئه‌كوشت. به‌ڵام له‌ لای هه‌ندێک هۆز ژن بایه‌خی خۆی هه‌بوه‌ و ته‌نانه‌ت ڕۆلی گرینگیان هه‌بوه‌ له‌ بازرگانی. بۆ نمونه‌ "خدیجه"‌ی ژنی یه‌که‌می په‌یامبه‌ری ئیسلام، ژنی "أبوسفیان" ڕۆلێکی گرینگی هه‌بوه‌ له‌ بڕیاردان، ته‌نانه‌ت ژنی شاعیریان زۆر هه‌بوه‌، هه‌روه‌ها له‌ پێش ئیسلام ژن کلیلی کعبه‌ی له‌ده‌ست بوه. له‌ ڕاستیدا هیچ که‌سێك ناتوانێت بڵێت عه‌ره‌ب هه‌ر هه‌مویان له‌ جه‌هاله‌ت ژیاون به‌لکو که‌سی به‌ بلیمه‌تیان هه‌بوه‌ و به‌ڵام سه‌رهه‌ڵدانی ئیسلام وه‌رچه‌رخاندی سه‌ده‌یه‌کی نوێیدا به‌ خۆی تا وای لێهات‌ پێش خۆی ناوز‌ه‌د کرد به‌ سه‌ده‌یه‌کی جاهیلی.

هه‌ندێك له‌ تیره‌ ناوداره‌کانی ناوچه‌ی مه‌كکه‌ و مه‌دینه، وه‌ک قریش و چه‌ندینی تر،‌ خه‌ریكی بازرگانی نێوان دورگه‌ی عه‌ره‌بی و شام بون. شام ناوچه‌ی سوریای و فه‌له‌ستین و ئوردن و لوبنانی ئێستا ئه‌گرێته‌وه‌. ئه‌و كه‌ل و په‌لانه‌ی‌ له‌ شام به‌رهه‌م ئه‌هات له‌ ڕێگای مه‌ککه‌ و مه‌دینه‌ ئه‌گه‌یشته‌ ناوچه‌ی یه‌مه‌ن. به‌ هه‌مان شێوه‌ش كه‌ل و په‌لی یه‌مه‌نیه‌كان له‌ ناوچه‌ی شام ئه‌فرۆشران. مه‌ککه‌ و مه‌دینه‌ نه‌ ناوچه‌یه‌كی پیشه‌سازی بو نه‌ ناوچه‌یه‌كی كشتوكاڵی بو. به‌لکو ناوچه‌یه‌كی سه‌ره‌ڕێ بو.

گوزه‌رانی عه‌ره‌ب له‌م ناوچه‌ بیابانیه‌دا زۆر سه‌خت بوه‌ چونكه‌ نه‌ ئه‌یان توانی كشتوكاڵ بكه‌ن و نه‌ئه‌شیان توانی پێشه‌سازی ببێته‌ سه‌رچاوه‌ی گوزه‌رانیان. به‌ هۆی سه‌ره‌ڕێی مه‌ککه‌ و مه‌دینه‌ توانیان بژێوی خۆیان له‌سه‌ر دوو بنه‌ما به‌رنه‌سه‌ر:

یه‌ك: ڕێگری بکه‌ن له‌ كاروانه‌ بازرگانیه‌كان.

دوو: خۆیان بازرگانی بكه‌ن.

له‌ ڕووی ئه‌ده‌به‌وه‌، عه‌ره‌ب زۆر ناسراو بون به‌ وێژه‌وانی. عه‌ره‌ب تاكه‌ میلله‌ته‌ كه‌ ژماره‌ی ناوی شاعیرانی تاوه‌كو ئێستا به‌ تۆماری مابێت. ئه‌گه‌ر میلله‌تانی تر مێژویان ون نه‌بوبێ ئه‌وا ئه‌توانین بلێن عه‌ره‌ب له‌ هه‌مو نه‌ته‌وه‌یه‌ك شاعیری زیاتر بوه‌. ئه‌گه‌ر سه‌رنجی مێژوی نه‌ته‌وه‌كانی تر بده‌ین هیچ رێژه‌یه‌كی وامان به‌ده‌ست ناكه‌وێ به‌ رێژه‌ی شاعیری عه‌ره‌بی. ته‌نها له‌ سه‌رچاوه‌ی "معاریف ابن قتیبة‌" زیاتر له‌ 99 شاعیر ناوی تۆماركراوه‌، هه‌ربۆیه‌ بازارێكیان هه‌بوه‌ به‌ بازاری عوكاز"سوق عکاظ" ناسراو بو شاعیره‌كان كۆئه‌بونه‌وه‌ و شیعریان ئه‌گوت به‌سه‌ر خه‌لك و له‌بڕه‌كه‌ی پاره‌یه‌كیان وه‌رئه‌گرت. زۆر شاعیریان هه‌بوه‌ سروشی یه‌كسه‌ری هه‌بوه‌، كاتێك كه‌سێكی ناودار به‌و بازاره‌ تێپه‌ریوه‌ یه‌كسه‌ر هۆنراوه‌یه‌كیان به‌سه‌ردا هه‌لگوتوه‌ بۆ ئه‌وه‌ی پاره‌یه‌كی باشیان ده‌ست كه‌وێ.

له‌ یه‌كێك له‌ داب و نه‌ریتی عه‌ره‌به‌کانی ئه‌و سه‌رده‌مه‌دا، فره‌ ژنخواستن و هه‌بونی كه‌نیزك شتێكی باو بوه‌ و سنوری نه‌بوه‌. هه‌روه‌ها به‌شودانی ژن بۆ چه‌ند جارێك شتێكی ئاسای بوه‌. ته‌نانه‌ت ژن وه‌ك میرات به‌جێ ئه‌ما بۆ كوره‌گه‌وره‌ی مێردی كه‌ له‌ ژنێكی تر بوایه‌. واته‌ باوه‌ژن زۆر ئاسای بوه‌ ماره‌ بكرێته‌وه‌ بۆ كوره‌ گه‌وه‌ری مێردی كه‌ ئێستا زۆر سه‌خته‌ بۆ ئێمه‌ قبولی بكه‌ین.

له‌وانه‌( "حصن بن أبي قیس" باوه‌ژنه‌كه‌ی "كبیشة‌ بنت معن"، "صفوان بن امیة‌ بن خلف" باوژنه‌كه‌ی "فاختة‌ بنت الاسود بن المطلب"، "منصور بن ماذن" باوژنه‌كه‌ی "ملكیة‌ بنت خارجة"‌ هه‌ره‌وه‌ها "الاسود بن خلف"، "سامة بن لؤي" باوه‌ژنه‌که‌ی "ناجیة") ماره‌كردۆته‌وه‌، ئه‌م داب و نه‌ریته‌‌ تاسه‌رده‌مه‌ی كۆچ كردنی په‌یامبه‌ر مابو.

بۆ نمونه‌ "قیس" یه‌كێك بو له‌ پیاوه‌ دروسته‌كانی الانصار، له‌پاش مردنیدا كوره‌كه‌ی ژنه‌كه‌ی ده‌زگیران ئه‌كاته‌وه‌. واته‌ 13 ساڵ پاش سه‌رهه‌ڵدانی ئیسلام ئه‌و كه‌لتوره‌ هه‌ر مابو هه‌ر بۆیه‌ ئایه‌تی 22ی سوره‌تی النساء دائه‌به‌زێ و ئه‌م ڕه‌فتاره‌ له‌ناو ئه‌چێ .

ئه‌گه‌ر سه‌یری كتێبی (المعاریف لابن قتتبة) ‌ بكه‌ین ئه‌بینین زۆر له‌ كوڕان باوه‌ژنی خۆیان هێناوه‌ته‌وه‌ و مندالیشیان لێ که‌وتۆته‌وه‌‌.

بۆ نمونه‌ "برة‌" ژنی "خزیمة"‌ ئه‌بێت، به‌ مردنی مێرده‌كه‌ی كوره‌كه‌ی "كنانة"‌ ئه‌یخـوازێت و مناڵێكی لێ ده‌بێت ‌ناوی "النضر بن كنانة"‌ ده‌بێت‌.

"عبدالمناف" ژنێكی ئه‌بێت به‌ ناوی "واقدة‌". منداڵه‌كانی له‌و ژنه‌ ( نوفلا، ابا عمر،‌ هاشم) ئه‌بێت كاتێك‌ ئه‌مرێت كورێكی تری له‌ ژنێكی تر "واقدة‌" ئه‌خوازێت و ئه‌ویش دوو منداڵی ئه‌بێت به‌ ناوی "خالدة"‌ و "ضعیفة"‌.

"امنة"‌ ژنێكی تره‌ له‌لای "امیة‌ بن عبدشمس" ئه‌بێت و مندالێكی ئه‌بێ به‌ ناوی "الاعیاص". پاش مردنی مێرده‌که‌ی، مێرد به‌ كوره‌ گه‌وره‌كه‌ی مێردی ئه‌كات كه‌ ناوی "ابو عمرو بن امیة‌" ئه‌بێ له‌ویش منداڵێكی ئه‌بێت به‌ ناوی "ابا معیط".

"ملیكة"‌ ژنێكی تر ئه‌بێت له‌لای "زبان بن سیار" ئه‌بی پاشان ئه‌بێته‌وه‌ ژنی كوره‌كه‌ی كه‌ ناوی "منظور بن زبانة"ه‌. له‌و مێرده‌ش دوو منداڵی ئه‌بێت ناویان "خولة‌ بن منظور" و "هاشم بن منظور" ئه‌بێت.‌ "خه‌ولة"‌ش مێرد به‌ "حسن بن علی الحسن" ده‌كات و منداڵێكی لێ ئه‌بێت‌ ناوی لێ ئه‌نێت "حسن". "ملیكة‌" پاشان مێرد به‌ "محمد بن طلحه‌ بن عبدالله" ده‌كات و كورێكی له‌ویش ئه‌بێت به‌ ناوی "ابراهیم بن محمد".

ژنێكی الانصارى له‌لای "إساف بن زید بن إساف" ده‌بێت و پاشان مێرد به‌ كوره‌كه‌ی ئه‌كاته‌وه‌ كه‌ ناوی "إساف" ده‌بێت.

ژنێك له‌ تیره‌ی "فهم" له‌لای "نفیل بن عبدالعزی" ئه‌بێت كه‌ باپیری "عمر بن الخطاب"ه‌ واته‌ له‌یه‌كێك له‌ منداله‌كه‌یان به‌رێز "خطاب"ه‌ ئه‌بێته‌ باوكی "عمر". پاشان مێرد به‌ كوره‌كه‌ی "نفیل بن عبدالعزی" ئه‌كاته‌وه‌ كه‌ ناوی "عمرو بن نفیل"ه له‌و مێرده‌شی كورێكی ئه‌بێت ناوی "زیدا" ئه‌بێت. ئه‌و "ز‌یدا"یه‌‌ش یه‌كێك ئه‌بێت له‌و ده‌ كه‌سه‌ی كه‌ موژده‌ی‌ به‌هه‌شتیان پێ دراوه‌.

له‌ یه‌كێك له‌ دابونه‌ریتی تری عه‌ره‌بی ئه‌و سه‌رده‌مه‌، له‌ ساڵێكدا چوار مانگیان زۆر پیرۆز بووه‌ به‌ شێوه‌یه‌ک شه‌ڕیان تێدا حه‌رام كردبو‌، ناوی مانگه‌كان بریتی بو له‌ (ذو القعدة‌، ذو الحجة‌، المحرم و رجب). زۆرجاریش له‌م مانگانه‌دا ئاشتبونه‌وه‌ له‌ نێوان تیره‌كان ڕوی ئه‌دا. واته‌ ئه‌توانین بلێن عه‌ره‌ب پێش ئیسلام چوار مانگ به‌ ئاشتی ژیاون!

تێبینی: ئەم نوسینە بەردەوام دەبێت لەچەند بەشێکدا و چاوەڕوانی بەشی سێیەم بن.

ئەمەی خوارەوە، لینکی بەشی یەکەمی نوسینەکەیە:
 http://xwdakan.com/xwdakan/index.php/%E2%80%8Chamajor/3300-0.html

 

 

 

 
ڕێکه‌وتی بڵاوکردنه‌وه 2013-12-16 10:52:00
به‌شی ( سه‌ره‌تا ) ئاماده‌کرد ( خوداکان )



0بۆ, زیاتر, ئاشنا, بون, به‌, ئاین, و, مێژوی, ئیسلام, زۆر, پێویسته‌, به‌, كورتی, باسی, ژیان, و, ڕه‌چه‌ڵه‌كی, عه‌ره‌ب, بكه‌ین, و, بزانین, ئه‌م, نه‌ته‌وه‌, لهخوداکانچێنەر, سێبەری, شمشێرەکان, تێگەیشتن, لەئیسلام, به‌شی, دووهه‌م Tags





په‌خشی ده‌نگی ئازاد


مه‌ریوان هه‌له‌بجه‌یی
زنجیره‌ به‌رنامه‌ی ئاوێنه.
ڕۆژی 08/17/2017
کاتژمێر 21:00 ناوه‌ڕاستی ئه‌وروپا
فاتیح محمود احمد
فاتیح محمود احمد چیرۆکێکی تری محمد
ڕۆژی 08/11/2017
کاتژمێر 23:00 ناوه‌ڕاستی ئه‌وروپا
فاتیح محمود احمد
مێژوە خوێناویەکەی قورئان و محمد
ڕۆژی 08/09/2017
کاتژمێر 22:00 ناوه‌ڕاستی ئه‌وروپا