عومەر عەلی غەفوور:دژایەتیكردنی خوا!










 



لە كتێبی "گوتاری ئاینی لە ژێر وردبیندا، 2010" ژمارەیەك لە خەسڵەتە لاوازەكانی گوتاری ئاینیم باس كردووە، بەتایبەت گوتاری وتاربێژانی هەینی و بانگخوازەكان، یەكێك لەو خەسڵەتانە هەژاریی زۆر لەوانەیە لە مەعریفەی زانستی و قووڵبوونەوەی بابەتییانە و وردبوونەوە لە رەگ و ریشە و سەرچاوە و رادەی راستیی ئەو زانیاری و چیرۆك و بۆچوونانەی وەك مەعریفەی ئاینی دەیانچۆڕێننە هۆشی خەڵكەوە. بەداخەوە كە رۆژانە بەڵگەی نوێ لەسەر راستیی ئەو بۆچوونە كەڵەكە دەبن.



هەینیی رابردوو خەتیبی مزگەوتێكی شاری هەولێر، باسی ئەوەی دەكرد هەركەس دژایەتیی خوا بكا، خوا رێسوای دەكات و لەناوی دەبا، تا ئێرە كێشە نییە، كێشە لەوەدایە سێ چوار چیرۆكی بە حساب واقیعی لەو بارەیەوە هێنایەوە كە سەرتاپایان هەڵە و بێ بناغە و ناماقووڵ بوون:



* كەشتیی تایتانیك: مامۆستا گوتی كەشتییەكی دوو نهۆمیی وا گەورە و بەهێزیان دروست كرد كە مەترسیی تێكشكانی نەبێ، بە رادار هەموو شتێكی كەشف دەكرد، تەنانەت ئەوەندە متمانەیان پێی هەبوو بەلەمی فریاكەوتنیشیان بۆ دانەنا، بەڵام دژایەتیی خوایان كرد و لەسەر كەشتییەكەیان نووسی "ئەم كەشتییە تەنانەت خوایش ناتوانێ تێكی بشكێنێ"، هەربۆیە خوای گەورە كێشای بە شاخێكی بەفردا و كردی بە دوو پارچەوە و ژمارەیەكی كەمیان نەبێ هەموو تیا چوون. هەتا كاپتنەكە بەكەشتییەكەی گوت "خۆ خۆتت بە دژایەتیكەری خوا دائەنا، بۆچی وا تێكشكای؟!".



مامۆستا پێی نەگوتین لە چ سەرچاوەیەكدا باسی ئەوە كراوە دروشمی وا لەسەر تایتانیك نووسراوە، (بڕوانە وێنەكانی كەشتییەكە)، كوا خوا كردوویەتی بەعادەت هەركەس كوفر بكا یەكسەر لە ناوی ببا؟ ئەگەر وا بوایە كەس كوفر و بێ دینیی نەدەكرد. خۆ ئەگەر فەرزی مەحاڵ وایش بێ دەبوو كۆمپانیای كفركەر سزا بدرێ نەك زیاتر لە 1500 سەرنشینی بێتاوان باجەكەی بدەن.



* كەشتیی ئەشلنجەر (چەڵنجەر): مامۆستا گێڕایەوە: "لە وڵاتێك، ئەڵڵاهو ئەعلەم ئەمریكا بووە، كەشتییەكی ئاسمانی بە حەوت كەشتییەوانەوە چوو بۆ بۆشایی ئاسمان، لە ناویاندا پزیشكێك و ژن و مێردێكیان دانابوو، تا هەر لە فەزا جووت ببن و منداڵیان ببێ و بگوترێ ئەها ئەو مرۆڤە لە زەوی لە دایك نەبووە، كەشتییەكەیشیان ناونا "ئەشلنجەر" واتە تەحەددا، تەحەددای خوایان پێ كرد، هەربۆیە دوای حەفتا چركە لە هەستانی، بوو بە خۆڵەمێش".



جارێ من -بەچاوپۆشین لەو سیناریۆیە- نازانم ئەگەر كەسێك لە فەزا لە دایك ببێ بۆچی گژبەری (تەحەدا)ی خوایە؟ ئەمە جگە لەوەی ناونانی كەشتیی ئاسمانیی چاڵنجەری ئەمریكی (نەك ئەشلنجەر وەك مامۆستا گوتی) بەو ناوەوە كە بەواتای "گژبەریكار" دێ، بۆچی دەبێ وا بزانرێ مەبەست گژبەریكردنی خوا بووە؟! ئاخر چاڵنجەر پێشتر نۆ گەشتی سەركەوتووی كردبوو، خێرە لە دەیەمدا خوا قاری لێ دەگرێ و تێكی دەشكێنێ؟ دەبوو لە یەكەمدا تێك بشكێ.



باشە وا گوتمان چاڵنجەر لە 28-1-1986بەهۆی غەزەبی خواوە تێكشكا، ئەی كەشتیی كۆڵۆمبیا بۆچی لە شوباتی 2003 تێكشكا؟ بۆچی وا دەزانرێ ئەمریكییەكان هەموو مولحید و زندیقن لە كاتێكدا ئەمریكا تا ئێستایش لەسەر دۆلارەكەی نووسیوە IN GOD WE TRUST واتە ئێمە بڕوامان بەخوا هەیە.



* نێبیسی سەرۆكی بەرازیل: مامۆستا گوتی: سەرۆكێكی بەرازیل بەناوی نێبیس لە كاتی هەڵمەتی هەڵبژاردندا گوتی ئەگەر پێنج هەزار دەنگ بێنم، دەبمە سەرۆكی وڵات تەنانەت ئەگەر خوایش رازی نەبێ. هەڵبژاردن كرا و راگەیەنرا كە نێبیس زیاتر لە پێنج هەزار دەنگی هێناوە و هەموولا چاوەڕوان بوون ببێتە سەرۆك، هەر لەوكاتەدا خوا تووشی جەڵتەی مێشكی كرد و بردییەوە بۆ لای خۆی.



راستییەكەی هیچ زانیارییەكم لەسەر ئەم كاندیدە بێچارە رووتەڵەیە دەست نەكەوت، بەڵام دڵنیام ئەویش بێڕەگ و ریشە و خەیاڵچنە، چونكە هیچ كاندیدێكی سەرۆكایەتیی بەرازیل بە بەدەستهێنانی پێنج هەزار دەنگ نایباتەوە.



* هەروەها گوتی ئەو پیاوەی قورئانی سووتاند هەردوو دەستی سووتان و بوون بە رەژوو. ئەم قسەیەیش ئەسڵ و ئەساسی نییە.



ئەڵبەت مامۆستا بۆ هیچ كام لەم چیرۆكانە سەرچاوەیەكی باس نەكرد. سەیر لەوەدایە زۆر لەم جۆرە چیرۆكانەی خوتبەكان بێ باوك و دایكن. 



براینە هەڵەیەكی گەورەیە خەڵك بە چیرۆك و بەسەرهاتی بێ بناغە و وەهمی گۆش بكرێ. هەڵەیە بناغەی هۆشی ئاینیی خەڵك شتی پڕوپووچ و بێ ئەسڵ و فەسڵ بێ. ئەوە چ مەنتیقێكی سەقەتە كە توێژینەوەی زانستی بە گژبەریكردنی ویستی خوا دابنرێ و تێكشكانی كەشتییەك -ئاسمانی یان دەریایی- كە هۆكاری تەكنیكییان هەیە و هاوكات كارەسات و زیانی گەورەن بۆ مرۆڤایەتی، بە قار و غەزەبی خوا دابنرێ و بەو وڕێنەیە ئیمانی خەڵك دەمەزەرد بكرێتەوە؟! كارەساتە تێكشكانی چاڵنجەر، كە لەو گەشتەیدا بۆ لێكۆڵینەوە لە كلكداری هالی چووە و كۆڵۆمبیا كە لەو گەشتەیدا بەتەما بووە ئەنجامی 80 تاقیكردنەوەی زانستی بۆ مرۆڤایەتی بێنێتەوە، بە غەزەب و تۆڵەی خوا دابنرێ. ئەوە سووكایەتیكردنە بە عەقڵ و ئەخلاق و زانست و مرۆڤایەتی.  ئەمە جگە لەوەی لۆژیكی پشت ئەو چیرۆكە هەڵبەستراوانە تەنانەت قورئانی پیرۆزیش پشتگیری ناكات. (بڕوانە، النحل: 61).



هەڵەی هەڵەكانی و نەگبەتیی نەگبەتیەكانیش ئەوەیە كەسانێك لەو ئاستە نزم و لاوازەی بیركردنەوە و مەعریفەدا ببنە دەمڕاست و رابەری رۆحیی خەڵك، كە دوور نییە ئەگەر لە هەڵبژارنیش خۆیان كاندید بكەن دەیان هەزار دەنگ بێنن.



ئەوەی ئەم هەینییە من و سەدانی تر بیستمان هەر بەڕاستی وڕێنە خوتبە بوو. ناخۆشبەختانە نموونەیشی كەم نین.



 - ماڵپه‌ڕی(وشه‌)






ڕێکه‌وتی بڵاوکردنه‌وه 2013-11-03 05:34:00
به‌شی ( وتار/بابه‌ت ) ئاماده‌کرد ( نووسینی عومەر عەلی غەفوور )



هەینیی, رابردوو, خەتیبی, مزگەوتێكی, شاری, هەولێر, باسی, ئەوەی, دەكرد, هەركەس, دژایەتیی, خوا, بكا, خوا, رێسوای, دەكات, و, لەناوی, دەبا, تا, ئێرە, كێشە, نییە, كنووسینی, عومەر, عەلی, غەفوورعومەر, عەلی, غەفووردژایەتیكردنی, خوا Tags





په‌خشی ده‌نگی ئازاد


مه‌ریوان هه‌له‌بجه‌یی
زنجیره‌ به‌رنامه‌ی ئاوێنه.
ڕۆژی 08/17/2017
کاتژمێر 21:00 ناوه‌ڕاستی ئه‌وروپا
فاتیح محمود احمد
فاتیح محمود احمد چیرۆکێکی تری محمد
ڕۆژی 08/11/2017
کاتژمێر 23:00 ناوه‌ڕاستی ئه‌وروپا
فاتیح محمود احمد
مێژوە خوێناویەکەی قورئان و محمد
ڕۆژی 08/09/2017
کاتژمێر 22:00 ناوه‌ڕاستی ئه‌وروپا