مه‌ریوان هه‌ڵه‌بجه‌یی: سێکس و خواردنی گۆشتی مردوو له‌ که‌لله‌سه‌ری خالیدی کوڕی وه‌لیددا

 

خالیدی کوڕی وه‌لید خوشکه‌زای یه‌کێک له‌ ژنه‌کانی موحه‌ممه‌ده‌ به‌ ناوی مه‌یمونه‌ کچی ئه‌لحارث، له‌ساڵی حه‌وتی کۆچیدا، واته‌ دوای سه‌رهه‌ڵدانی ئیسلام به‌ بیست ساڵ، بووه‌ به‌ موسڵمان، که‌سێکی چاونه‌ترس بووه‌و موحه‌ممه‌د له‌پیاهه‌ڵدانێکدا وتویه‌تی که‌ ئه‌و یه‌کێکه‌ له‌ شمشێره‌کانی خودا. له‌دوای داگیرکردنی مه‌ککه‌، له‌سه‌ر فه‌رمانی موحه‌ممه‌د، شه‌ڕی خێڵی جه‌زیمه‌ (بني جذیمة)ی کردووه‌و کۆمه‌ڵکوژییه‌کی گه‌وره‌ی ئه‌نجامداوه‌، چونکه‌ ده‌ستی له‌ بێتاوان و منداڵه‌کان نه‌پاراستووه‌و هه‌موویانی کوشتووه‌، هه‌روه‌ها دژ به‌ (موسه‌یله‌مه‌ی حه‌نه‌فی) له‌ ناوچه‌ی یه‌مامه‌ کۆمه‌ڵکوژییه‌کی دیکه‌ی ئه‌نجامداوه‌، دواتریش ده‌وری کاریگه‌ری هه‌بووه‌ له‌ شه‌ڕی فارس و رۆمه‌کاندا، هه‌ر له‌سه‌ر ده‌ستی ئه‌ویش بووه‌ ناوچه‌ی شام (دیمه‌شق و ده‌وروبه‌ری) داگیرکراوه‌، ساڵی بیست و یه‌کی کۆچی، له‌سه‌رده‌می خه‌لافه‌تی عومه‌ردا مردووه‌.  

مالکی کوڕی نووه‌یره‌ یه‌کێک بووه‌ له‌ سه‌رکرده‌ دیارو متمانه‌پێکراوه‌کانی خێڵی یه‌ربوع (بني یربوع) له‌ هۆزی ته‌میم، خۆی و براکه‌ی ئه‌سپسوارێکی ئازاو شاعیرێکی ناوداری هۆزه‌که‌ی خۆیان بوون، له‌لایه‌ن شاعیره‌کانی دیکه‌شه‌وه‌ چه‌ندین په‌ندو شیعریان به‌سه‌ردا هه‌ڵداوه‌، به‌ هۆی موسڵمانبوونی ئه‌م پیاوه‌وه‌ هه‌موو که‌سوکارو هۆزه‌که‌ی بوونه‌ته‌ موسوڵمان، یه‌کێک بووه‌ له‌ صه‌حابه‌کانی موحه‌ممه‌دو  له‌ ده‌ستپاکی و متمانه‌ییدا  موحه‌ممه‌د کردبوی‌ به‌ سه‌رپه‌رشتی ئه‌و پاره‌وپوله‌ی که‌ له‌ ڕێی زه‌کاته‌وه‌ کۆده‌کرانه‌وه‌.

مالک که‌سایه‌تیه‌کی کاریزمایی هه‌بووه‌، مێژوونوسان باسیان له‌ میهره‌بانی ئه‌و کردووه‌ به‌شێوه‌یه‌ک که‌ هه‌رگیز ئاگر له‌ماڵه‌که‌یدا نه‌کوژابێته‌وه‌، واته‌ هه‌میشه‌ خواردن و خواردنه‌وه‌ی بۆ میوانان و هه‌ژاران و که‌سانی بێ په‌نا ئاماده‌بووه‌، به‌ڵام ڕۆژگارێک هاتۆته‌ پێش که‌ به‌فه‌رمانی خالیدی کوڕی وه‌لید بکوژرێت و له‌هه‌مان شه‌ودا له‌یلای هاوسه‌ریشی لاقه‌ بکرێت.

هاوسه‌ره‌که‌ی مالک، له‌یلای کچی سینان، یه‌کێک بووه‌ له‌ هه‌ره‌ جوانه‌کانی عه‌ره‌ب و له‌ نازداریدا به‌ناوبانگ بووه‌، جوانیی ئه‌وو شیعره‌کانی مالک به‌سه‌ر ئه‌ودا، له‌ته‌واوی ناوچه‌که‌ ده‌نگی دابووه‌وه‌.

له‌نێوان ئه‌م دوو سه‌رکرده‌یه‌دا، مالک و خالید، شه‌ڕێکی خوێناوی پڕ له‌ شه‌رمه‌زاری ڕوویداوه‌، ده‌رباره‌ی هۆکاری هه‌ڵگیرسانی شه‌ڕه‌که‌ش چیرۆکی جیاجیا هه‌یه‌، به‌ڵام به‌شی هه‌ره‌ زۆریان له‌سه‌ر ئه‌وه‌ کۆکن که‌ په‌یوه‌ندی به‌ زه‌کاته‌وه‌ هه‌بوو.

له‌ دوای مردنی موحه‌ممه‌دو دانانی (أبوبکری صدیق) به‌خه‌لیفه‌ی یه‌که‌م، چه‌ندین بنه‌ماڵه‌و خێڵ و هۆز، له‌ چه‌ندین ناوچه‌ی جیاجیاوه‌، له‌ پێدانی زه‌کات په‌شیمان بوونه‌ته‌وه‌، به‌م هۆیه‌وه‌ کێشه‌یه‌ک له‌و سه‌رده‌مه‌دا په‌یدابووه‌ که‌ له‌ مێژووی ئیسلامدا ناسراوه‌ به‌ جه‌نگی هه‌ڵگه‌راوه‌کان (حروب الردة). یه‌کێک له‌و که‌سایه‌تیانه‌، که‌ خه‌ڵکانێکی زۆر شوێنکه‌وته‌ی بوون و له‌ پێدانی زه‌کات په‌شیمان بوونه‌وه‌، مالک بوو، به‌ ئاشکرا رایگه‌یاند که‌ چیتر زه‌کات به‌ خه‌لیفه‌ نادات.

بۆ ئه‌م مه‌به‌سته‌ش خه‌لیفه‌ ئه‌بوبه‌کر کۆبونه‌وه‌یه‌کی گرنگی له‌گه‌ڵ صه‌حابه‌کاندا سازکرد، بۆچوونی خۆی وابووه‌ که‌ به‌ هێزی شمشێر وه‌ڵامی هه‌موو هه‌ڵگه‌ڕاوه‌کان بدرێته‌وه‌، به‌شێک له‌ ئاماده‌بوانیش بۆچوونه‌که‌ی ئه‌ویان به‌ باش نه‌زانیبوو، یه‌کێک له‌وانه‌ عومه‌ری کوڕی خه‌تتاب بوو، له‌ دیدگای ئه‌وانه‌وه‌: ئه‌گه‌رچی هه‌ڵگه‌ڕاوه‌کان زه‌کات ناده‌ن به‌ڵام باوه‌ڕیان به‌ خوای ئیسلام و په‌یامبه‌ره‌که‌ی هه‌یه‌و موسڵمانن ئیتر پێویست به‌وه‌ ناکات وه‌ک کافر ته‌ماشا بکرێن و بکوژرێن، له‌و کۆبوونه‌وه‌یه‌دا عومه‌ر به‌ ئه‌بوبه‌کری وتووه‌:

كَيْفَ تُقَاتِلُ النَّاسَ وَقَدْ قَالَ رَسُولُ اللَّهِ ‏ ‏صَلَّى اللَّهُ عَلَيْهِ وَسَلَّمَ ‏ ‏أُمِرْتُ أَنْ أُقَاتِلَ النَّاسَ حَتَّى يَقُولُوا لَا إِلَهَ إِلَّا اللَّهُ فَمَنْ قَالَ لَا إِلَهَ إِلَّا اللَّهُ فَقَدْ ‏ ‏عَصَمَ ‏ ‏مِنِّي مَالَهُ وَنَفْسَهُ إِلَّا بِحَقِّهِ وَحِسَابُهُ عَلَى اللَّهِ.

چۆن شه‌ڕی خه‌ڵکانێک ده‌که‌یت که‌ ده‌رباره‌یان په‌یامبه‌ری خوا وتویه‌تی: فه‌رمانم پێکراوه‌ شه‌ڕی خه‌ڵکی بکه‌م تا ده‌ڵێن جگه‌ له‌ خوا هیچ خوایه‌کی تر نییه‌، هه‌ر که‌سێکیش بڵێ جگه‌ له‌ خوا هیچ خوایه‌کی تر نییه‌ سه‌رو سامانی له‌ من حه‌رامه‌ به‌ حه‌قی خۆی نه‌بێت، (واته‌ ته‌نها له‌ رۆژی قیامه‌تدا لێپرسینه‌وه‌ی له‌گه‌ڵ ده‌کرێت) هه‌موو لێپرسینه‌وه‌یه‌کیشی ده‌گه‌ڕێته‌وه‌ بۆ خوا.

ئه‌بوبه‌کریش به‌م شێوه‌یه‌ وه‌ڵامی داوه‌ته‌وه‌:

 ‏ ‏وَاللَّهِ لَأُقَاتِلَنَّ مَنْ فَرَّقَ بَيْنَ الصَّلَاةِ وَالزَّكَاةِ.

سوێند به‌ خوا شه‌ڕی هه‌موو ئه‌وانه‌ ده‌که‌م که‌ نێوانی نوێژو زه‌کات جیاده‌که‌نه‌وه‌.

سه‌رئه‌نجام له‌ کۆبوونه‌وه‌که‌دا، له‌سه‌ر پێداگری ئه‌بوبه‌کر، بڕیار ده‌ده‌ن به‌ شمشێر کۆتایی به‌ هه‌ڵگه‌ڕاوه‌کان بهێنن. چه‌ندین له‌شکری جیا جیا به‌ناوچه‌کاندا بڵاو ده‌که‌نه‌وه‌و هێزێکی زۆری چه‌کدار ڕه‌وانه‌ی به‌ره‌کانی جه‌نگ ده‌که‌ن.

خالید یه‌کێک بووه‌ له‌و سه‌رکردانه‌ی که‌له‌گه‌ڵ له‌شکره‌که‌یدا ڕه‌وانه‌ کرابوو له‌دژی هه‌ڵگه‌ڕاوه‌کان شه‌ڕ بکات، پاش ئه‌وه‌ی چه‌ندین شه‌ڕی به‌سه‌رکه‌وتوویی له‌ دژی هه‌ڵگه‌ڕاوه‌کان ئه‌نجامدا، به‌بێ ئه‌وه‌ی فه‌رمانی پێبکرێت به‌ره‌و شه‌ڕی مالک و شوێنکه‌وتوانی چووه‌. که‌هه‌واڵی هاتنی له‌شکری خالید گه‌یشتووه‌ به‌ ناوچه‌که‌، مالک بڵاوه‌ی به‌ لایه‌نگرانی کردووه‌ تا ڕووبه‌ڕوی شه‌ڕ نه‌بنه‌وه‌. پاش ئه‌وه‌ی خالید چووه‌ته‌ ناوچه‌که‌وه‌، چه‌ند ده‌سته‌یه‌کی دروست کردووه‌ تا به‌شوێن هه‌ڵگه‌ڕاوه‌کاندا بگه‌ڕێن و بیاندۆزنه‌وه‌ تا بیانکوژن. مێژوونوسان باسی ئه‌وه‌یان نه‌کردووه‌ که‌ چۆن مالک و کۆمه‌ڵێک له‌ شوێنکه‌وتوانی به‌ شمشێره‌کانیانه‌وه‌ گه‌یشتوونه‌ته‌ لای خالید، به‌ڵام باسی ئه‌وه‌یان کردووه‌ که‌ لایه‌نگرانی خالید داوایان له‌ مالک و چه‌کداره‌کانی کردووه‌ شمشێره‌کانیان دانێن و پێکه‌وه‌ نوێژێک بکه‌ن. مالکیش ڕازی بووه‌ چونکه‌ خۆیان به‌ موسڵمان زانیبوو، شمشێره‌کانیان داناوه‌و ڕیزیان به‌ستووه‌و نوێژیان کردووه‌، به‌ڵام له‌ساته‌وه‌ختی ته‌واوبوونی نوێژه‌که‌دا له‌شکری خالید په‌لاماری ئه‌وانیان داوه‌، مالک و ئه‌وانه‌ی له‌گه‌ڵی بوون قۆڵبه‌ست کراون و له‌به‌رده‌م خالیددا دایانناون، جێی خۆیه‌تی ئه‌وه‌ بڵێین له‌ناو دیله‌کاندا له‌یلا، هاوسه‌ره‌ جوانه‌که‌ی مالکیشی تێدا بووه‌.

هه‌ندێک له‌ سه‌رچاوه‌کان باسی ئه‌م ساته‌وه‌خته‌یان کردووه‌و کۆمه‌ڵێک ڕوداوی په‌یوه‌ندیداریان هێناوه‌ته‌ گۆڕێ، ئێمه‌ باسکردنی ئه‌و ورده‌کاریانه‌ به‌ پێویست نازانین چونکه‌ مه‌به‌ستی ئێمه‌ گه‌ڕان نییه‌ به‌شوێن هۆو هۆکارو چه‌ندێتی و چۆنێتی، به‌ڵکو مه‌به‌ستی ئێمه‌ له‌ نیشاندانی دواهه‌مین حیوارو دواهه‌مین ده‌رئه‌نجامه‌ که‌په‌یوه‌ندی به‌ توێژینه‌وه‌که‌مانه‌وه‌ هه‌یه‌.

ئه‌بوبه‌کر فه‌رمانی به‌ له‌شکره‌کان کردبوو: هه‌ر کاتێک ده‌گه‌نه‌ ناوچه‌یه‌ک بانگ بده‌ن با خه‌ڵکی بێن و ڕیز ببه‌ستن و نوێژ بکه‌ن، ئه‌گه‌ر خه‌ڵکی ناوچه‌که‌ ئه‌مه‌یان کرد وازیان لێ بهێنن و ده‌ست مه‌هێننه‌ ڕێیان به‌ڵام داوای زه‌کاتیان لێ بکه‌ن، ئه‌گه‌ر نه‌هاتن بگه‌ڕێن به‌ شوێنیانداو بیاندۆزنه‌وه‌و بیانکوژن یان ئه‌گه‌ر بۆتان کرا بیانسوتێنن، خۆ ئه‌گه‌ر باوه‌ڕیان به‌ ئیسلام هێنا ئه‌وه‌ داوای زه‌کاتیان لێ بکه‌ن، ئه‌گه‌ر زه‌کاتیان دا وازیان لێ بهێنن ئه‌گه‌ر نه‌یاندا یه‌ک به‌یه‌کیان بکوژن.

پێش ئه‌وه‌ی گۆمه‌ خوێناویه‌که‌ بشڵه‌قێت خالیدو مالک هه‌ندێک گفتوگۆیان کردووه‌، کۆتایی گفتوگۆکه‌ش گه‌یشتووه‌ به‌وه‌ی خالد به‌ مالکی وتووه‌: من بکوژی تۆم، چونکه‌ تۆ په‌یوه‌ندیت به‌ کافرانه‌وه‌ کردووه‌. ئینجا داوای له‌ که‌سێک کردووه‌ به‌ناوی (ضیرار کوڕی ئیزوه‌ر) مالک سه‌رببڕێت.

دوو صه‌حابه‌ (عبدلله‌ بن عمر)و (ابو قتادة الانصاري) که‌ دوو که‌سایه‌تی ناوداری مێژووی ئیسلامن و له‌گه‌ڵ خالیددا چووبوونه‌ شه‌ڕه‌که‌وه‌، هه‌ست ده‌که‌ن که‌ خالید دادپه‌روه‌ر نییه‌و درێغی له‌ مالک ده‌کات، داوایان له‌ خالد کردووه‌ نه‌یکوژێت، به‌ڵام خالید داواکانی پشتگوێ خستوون.

فَالْتَفَتَ مَالِكٌ إِلَى زَوْجَتِهِ وَقَالَ: هَذِهِ الَّتِي قَتَلَتْنِي

ئیتر مالک لایه‌کی بۆ ژنه‌که‌ی خۆی کردۆته‌وه‌و به‌ خالیدی وتووه‌ ئه‌م ژنه‌م کوشتمی.

مه‌به‌ستی مالک ئه‌وه‌ بوو خالید چاوی بڕیوه‌ته‌ ژنه‌که‌ی و جوانیی ژنه‌که‌ی وای له‌ خالید کردووه‌ بڕیاری کوشتنی بدات و دواتر وه‌ک ده‌ستکه‌وتێکی شه‌ڕ ده‌ست به‌سه‌ر ژنه‌که‌شیدا بگرێت.

قَالَ خَالِدٌ: بَلِ اللَّهُ قَتَلَكَ بِرُجُوعِكَ عَنِ الْإِسْلَامِ، فَقَالَ: أَنَا عَلَى الْإِسْلَامِ، فَقَالَ: اضْرِبْ عُنُقَهُ، فَضَرَبَ عُنُقَهُ.

خالید وتی: نه‌خێر خوا ده‌تکوژێ که‌ له‌ ئیسلام هه‌ڵگه‌ڕاویته‌ته‌وه‌.

مالک وتی: نه‌خێر من له‌سه‌ر دینی ئیسلامم

خالید وتی: ئه‌ی زیرار، سه‌ری بڕه‌، زیراریش مالکی سه‌ربڕی.

ابن اثیر، که‌ یه‌کێکه‌ له‌ مێژوونوسه‌ باوه‌ڕپێکراوه‌کانی ئیسلام، به‌شێوازێکی دی باسی کردووه‌و ده‌ڵێت خالید بانگی مالکی کردووه‌و له‌وه‌ ئاگاداری کردۆته‌وه‌ که‌ ئه‌و له‌ ئایینی ئیسلام هه‌ڵگه‌ڕاوه‌ته‌وه‌ چونکه‌ باوه‌ڕی به‌ پێدانی زه‌کات نه‌ماوه‌، هه‌روه‌ها باوه‌ڕی به‌ که‌سێکی تر کردووه‌ که‌ په‌یامبه‌ره‌، ئه‌ویش ئافره‌تێک بوو به‌ناوی سه‌جاح، ئینجا پرسیاری لێ کردووه‌: ئایا تۆ نازانێت زه‌کاتیش هاوشانی نوێژکردنه‌.!؟ مالکیش وه‌ڵامی داوه‌ته‌وه‌ که‌ هاوه‌ڵه‌که‌تان به‌و شێوه‌یه‌ پاگه‌نده‌ی کردووه‌. (واته‌ موحه‌ممه‌د پڕوپاگه‌نده‌ی ئه‌وه‌ی کردووه‌ که‌ گوایه‌ زه‌کاتیش له‌ئاستی نوێژکردندایه‌، ده‌نا من بڕوام پێی نییه‌) به‌م وه‌ڵامه‌ خالید په‌ست بووه‌و پێی وتووه‌: ئایا ئه‌و هاوه‌ڵی ئێمه‌یه‌و هاوه‌ڵی تۆ نییه‌.!؟ ئه‌ی زیرار بده‌ له‌ گه‌ردنی.. ئیتر زراریش سه‌ری بڕیوه‌.

دوای سه‌ربڕینی مالک، یه‌که‌ یه‌که‌ دیله‌کانی تریان سه‌ربڕیوه‌ که‌ به‌ دوانزه‌ که‌س مه‌زه‌نده‌ کراون، سه‌ره‌ بڕاوه‌کانیان خستۆته‌ ناو قازانێکی گه‌وره‌وه‌و کوڵاندویانن. مالک که‌سێکی زۆر توکن بووه‌، ئه‌وه‌نده‌ تووک و قژ و ڕیش و سمێڵی بژو درێژو پڕ بووه‌ ئاوه‌ کوڵاوه‌که‌ نه‌یتوانیوه‌ به‌ باشی سه‌رو که‌لله‌ی بکوڵێنێت بۆیه‌ زیاتر چاوه‌ڕوانیان کردووه‌، دوای کوڵاندنیان:

فَأَكَلَ مِنْهَا خَالِدٌ تِلْكَ اللَّيْلَةَ لِيُرْهِبَ بِذَلِكَ الْأَعْرَابَ مِنَ الْمُرْتَدَّةِ وَغَيْرِهِمْ.

هه‌ر ئه‌و شه‌وه‌ خالید لێی خوارد تا ئه‌عرابه‌کان له‌ هه‌ڵگه‌ڕاوه‌و نموونه‌ی وه‌ک هه‌ڵگه‌ڕاوه‌کان بتۆقێنێت.

دواتر:

وَاصْطَفَى خَالِدٌ امْرَأَةَ مَالِكِ بْنِ نُوَيْرَةَ.

هه‌روه‌ها خالید ژنه‌که‌ی مالکی له‌ناو ژنه‌ تاڵانیه‌کانی تردا بۆی خۆی هه‌ڵبژارد.

ئه‌بو قیتاده‌ به‌م کۆمه‌ڵکوژی و غه‌دره‌ی خالید په‌ست و نیگه‌ران بووه‌و گه‌راوه‌ته‌وه‌ بۆ مه‌دینه‌و چیرۆکه‌که‌ی بۆ ئه‌بوبه‌کری صدیق و عومه‌ری کوڕی خه‌تتاب گێڕاوه‌ته‌وه‌، سوێندیشی خواردووه‌ که‌ چیتر نه‌چێته‌ هیچ شه‌ڕێکه‌وه‌ که‌ خالید سه‌رکردایه‌تی له‌شکره‌که‌ بکات. هه‌روه‌ها عومه‌ری کوڕی خه‌تتابیش به‌ خالیدی وتووه‌:

 يَا عَدُوَّ اللَّهِ قَتَلْتَ‌ امْرَأً مُسْلِمًا ثُمَّ نَزَوْتَ عَلَى امْرَأَتِهِ ، لَأَرْجُمُنَّكَ.

 ئه‌ی دوژمنی خودا، که‌سێکی موسڵمانت کوشت و ژنه‌که‌یت لاقه‌ت کرد، ئه‌بێ ڕه‌جمت بکه‌م.

به‌ڵام ئه‌بوبه‌کری صدیق نه‌یهێستووه‌و به‌ عومه‌ری وتووه‌:

تَأَوَّلَ فَأَخْطَأَ.

لێی مه‌گره‌ وای زانیوه‌ کارێکی باشی کردووه‌ به‌ڵام به‌ هه‌ڵه‌دا چووه‌.[1]

له‌م توێژینه‌وه‌ کورته‌دا هه‌وڵی ئه‌وه‌مان نه‌داوه‌ هه‌ق و ناهه‌ق جیا بکه‌ینه‌وه‌و لایه‌نگیری خۆمان بۆ لایه‌کیان نیشان بده‌ین، به‌ڵام ناوه‌ڕۆکی به‌سه‌رهاتی ئه‌م چیرۆکه‌ پیمان ده‌ڵێت: هه‌ندێک ڕووداوی مێژوو هه‌ن که‌ به‌ خوێندنه‌وه‌یان مرۆڤ توشی شۆک ده‌بێت و ناتوانێت به‌ ئاسانی له‌بیر خۆی بباته‌وه‌.! ئێمه‌ چۆن بتوانین ئه‌م کاره‌ساتانه‌ شی بکه‌ینه‌وه‌: سه‌ربڕینی مرۆڤه‌کان، کوڵاندنیان له‌ قازانێکی گه‌وره‌داو دواتر خواردنیان، په‌لاماری ژن و منداڵه‌کانیان، له‌ پاش ئه‌م گۆمه‌ خوێناویه‌ هه‌ست به‌ هیچ له‌که‌و شوره‌ییه‌ک نه‌که‌ن، خوێن نه‌یانگرێ به‌ڵکو غه‌رزه‌ی سێکسیان بجوڵێت و لاقه‌ی ئافره‌ت بکه‌ن، ئه‌مه‌ له‌کاتێکدا که‌ هه‌ر ئه‌و ڕۆژه‌ مێرده‌که‌ی و خۆشه‌ویسته‌کانی تری سه‌ربڕاون، به‌ فیزو له‌خۆباییبونه‌وه‌ باسی سه‌رکه‌وتنی خۆیان بگێڕنه‌وه‌، ئه‌مه‌ جگه‌ له‌ شانۆنامه‌یه‌کی پڕ له‌ شه‌رمه‌زاری هیچ شیکردنه‌وه‌یه‌کی دی هه‌ڵناگرێت، چونکه‌ مرۆڤ ناتوانێت دڕنده‌یی سیسته‌مێکی ئاوا خوێناوی له‌بیر بکات.

ئایا چاوه‌کانی خالید، له‌پاش بینینی سه‌ربڕین و فیچقه‌ی خوێن له‌ گه‌ردنی مرۆڤه‌کانه‌وه‌، له‌دوای کوڵاندنیان و له‌ دوای خواردنیان، ئه‌وه‌ چۆنه‌ توانیوێتی هه‌ست به‌ دیمه‌نی جوان بکات و مێینه‌یی له‌ رووخساری مرۆڤدا بیبینێت؟! ئه‌وه‌ چۆنه‌ ئاره‌زووه‌ سێکسیه‌که‌ی جوڵاوه‌و ئه‌وه‌ چۆنه‌ توانیوێتی بچێته‌ په‌رده‌ی لاقه‌کردنی ژنێکه‌وه‌ که‌ له‌به‌رده‌میدا خۆشه‌ویسته‌که‌یان سه‌ربڕیوه‌.؟! ئێمه‌ چۆن بتوانین شیکردنه‌وه‌یه‌کی زانستی بۆ دیارده‌ی سێکس له‌م چیرۆکه‌دا بکه‌ین: ئه‌مه‌ی خالید کردی ئایا دیارده‌یه‌کی سروشتیه‌ یان ئه‌مه‌ به‌رهه‌مده‌هێنرێت و مێژووکرده‌.؟ ئه‌مه‌ ده‌چێته‌ ناو چ رێسایه‌کی ئایینی و چ گوتارێکی میتافیزیکی و تێکه‌ڵ به‌ چ ئه‌خلاقێک ده‌بێت.؟!؟ له‌ ڕاستیدا وه‌ڵامی ئه‌م پرسیارانه‌ چه‌ندی توێژینه‌وه‌ی گرنگی ده‌وێت که‌ ڕه‌نگه‌ ئێمه‌ نه‌توانین هه‌موو گۆشه‌کانی ببینین.

موحه‌ممه‌دی په‌یامبه‌ری موسڵمانان خالیدی کوڕی وه‌لیدی چواندووه‌ به‌ یه‌کێک له‌ شمشێره‌کانی خودا، ئیتر پێویست ناکات ئێمه‌ به‌شوێن ناوێکدا بگه‌ڕێین که‌ بۆ خالید شیاو بێت و بتوانێت وێنه‌یه‌کی حه‌قیقی که‌سێکمان نیشان بدات که‌ وه‌ک خالید بۆ کوشتنی مرۆڤ جه‌للادێکی بێ وێنه‌ بێت، بۆ کوشتنی دیل پاڵه‌وانێکی خوێنسارد بێت، بۆ ئه‌تککردنی ئافره‌تان قاره‌مانێکی لاقه‌که‌ر بێت، له‌ خواردنی گۆشتی مرۆڤیشدا گورگێکی ئاده‌می بێت.

مێژووی ئیسلام پڕ پڕه‌ له‌م جۆره‌ به‌سه‌رهاتانه‌، له‌پاش سه‌رکه‌وتنی هه‌ر شه‌ڕێک موجاهیده‌ موسڵمانه‌کان ڕاهاتوون په‌لاماری ژن و منداڵه‌کان بده‌ن و به‌دیل بیانگرن، دوای ئه‌وه‌ی له‌به‌رچاویان باوک و مێردو براو کوڕیان سه‌رده‌بڕن و له‌ناو خۆیاندا دابه‌شی ده‌که‌ن، ‌وه‌ک بڵێی له‌و ڕۆژه‌دا هیچ ڕووی نه‌دابێت، یه‌کسه‌ر بیر له‌ خه‌فه‌کردنی غه‌ریزه‌ سێکسیه‌کانیان ده‌که‌نه‌وه‌، جله‌ خوێناویه‌کانیان داده‌که‌نن و به‌ خوێنێکی زۆر سارده‌وه‌، بۆ دامرکانده‌وه‌ی چوکی ڕه‌پیان لاقه‌ی ئافره‌ته‌ دیلکراوه‌کان ده‌که‌ن، به‌م کاره‌شیان هه‌ست به‌ هیچ له‌که‌و شوره‌ییه‌ک ناکه‌ن و بگره‌ به‌ له‌خۆباییبونه‌وه‌، باسی خوێنڕشتن و لاقه‌کردنه‌کانیان بۆ یه‌کتری ده‌گێڕنه‌وه‌، سه‌دان ساڵه‌ له‌ناویاندا ئه‌م ڕه‌وشت و نه‌رێته‌ باوه‌و وڵات و کۆمه‌ڵگایه‌ک شک نابه‌ین شه‌ڕی ئیسلامیه‌کانی تێدا بێت و ئه‌م نه‌رێته‌ی تێدا دووپات نه‌بوبێته‌وه‌، په‌رده‌کانی شانۆگه‌ری ئه‌م کلتوره‌ پڕ له‌ شه‌رمه‌زاریه‌ به‌بێ ڕاوه‌ستان تا ئێستاش هه‌ر به‌رده‌وامه‌.

 

له‌ ڕاستیدا ڕاڕه‌وی مێژووی هیچ نه‌ته‌وه‌یه‌ک خاڵی نییه‌ له‌به‌کارهێنانی توندڕه‌وی و زوڵم و خوێنڕشتن، چونکه‌ ئه‌م سیفه‌تانه‌ خه‌سڵه‌تێکی دانه‌بڕاوی ژیانی کۆمه‌ڵه‌کانن به‌و کۆمه‌ڵگاو نه‌ته‌وانه‌شه‌وه‌ که‌ ئێستا له‌به‌رزترین ئاستی شارستانی و زانستیدا ده‌ژین، بۆیه‌ ئاساییه‌ که‌ بتوانین کۆمه‌ڵێک چیرۆکی هاوشێوه‌ له‌ مێژووی سه‌رجه‌م کۆمه‌ڵگاکاندا بخوێنینه‌وه‌، به‌ڵام دڕنده‌یی پیاوانی ئیسلامیه‌کان له‌به‌رامبه‌ر نه‌یارانیاندا ده‌گاته‌ چڵه‌پۆپه‌.! موجاهیده‌کان ڕاهاتوون، له‌به‌رامبه‌ر به‌رگریکردنیان له‌ ئیسلام، به‌ له‌ خۆبورده‌یی و جه‌رگبڕییه‌وه‌ ئاماده‌ی کوشتن و خۆکوشتن بن، نه‌رێتی هێرش و هه‌ڵه‌شه‌و هه‌ڵکوتینه‌سه‌ر له‌ناویاندا نموونه‌یه‌کی هه‌ره‌ به‌رزی زوڵم و غه‌درو ناپاکییه‌، له‌ هه‌موو ساته‌وه‌ختێکدا هی ئه‌وه‌ن نزیکترین که‌سی خۆیان په‌ل په‌ل بکه‌ن.


 

[1] بۆ ته‌واوی رووداوه‌که‌ بڕوانه‌ ئه‌م سه‌رچاوانه‌: صحيح المسلم، كتاب الإيمان، باب الأمر بقتال الناس حتى يقولوا لا إله إلا الله محمد رسول الله. ابن اثير: اسد الغابة في معرفة الصحابة، به‌شی پیتی(خ) خالد بن الوليد، به‌شی پیتی(م) مالك بن نويرة. حياة الصحابة، للكاندهلوى: قصة خالد بن الوليد ومالك بن نويرة. البداية والنهاية، ابن کثير. ج1 فصل في خبر مالك بن نويرة اليربوعي التميمي. ابن الحجر، العسقلاني: الإصابة في تمييز الصحابة.ج3ص337. العقاد فى عبقرية الصديق، الصديق ابوبكر، سير أعلام النبلاء، سيرة الخلفاء الراشدين، سيرة أبي بكر الصديق رضي الله عنه، مقتل مالك بن نويرة التميمي الحنظلي. عز الدين أبو الحسن علي المعروف بابن الأثير، الكامل في التاريخ، دار الكتاب العربي، سنة النشر: 1417هـ/1997،  الجزء الثاني، ذكر أحداث سنة إحدى عشرة » ذكر مالك بن نويرة.محمد حسين هيكل.ص143. الامام السيد عبدالحسين شرالدين: النص والاجتهاد، ص93-103. وفيات الاعيان 6/14

 

ڕێکه‌وتی بڵاوکردنه‌وه 2013-01-23 17:58:00
به‌شی ( مه‌ریوان هه‌ڵه‌بجه‌یی ) ئاماده‌کرد ( مه‌ریوان هه‌ڵه‌بجه‌یی )



خالیدی, کوڕی, وه‌لید, خوشکه‌زای, یه‌کێک, له‌, ژنه‌کانی, موحه‌ممه‌ده‌, به‌, ناوی, مه‌یمونه‌, کچی, ئه‌لحارث, له‌ساڵی, حه‌وتی, کۆچیدا, واته‌, دوای, مه‌ریوان, هه‌ڵه‌بجه‌ییمه‌ریوان, هه‌ڵه‌بجه‌یی, سێکس, و, خواردنی, گۆشتی, مردوو, له‌, که‌لله‌سه‌ری, خالیدی, کوڕی, وه‌لیددا Tags





په‌خشی ده‌نگی ئازاد


مه‌ریوان هه‌له‌بجه‌یی
زنجیره‌ به‌رنامه‌ی ئاوێنه.
ڕۆژی 08/17/2017
کاتژمێر 21:00 ناوه‌ڕاستی ئه‌وروپا
فاتیح محمود احمد
فاتیح محمود احمد چیرۆکێکی تری محمد
ڕۆژی 08/11/2017
کاتژمێر 23:00 ناوه‌ڕاستی ئه‌وروپا
فاتیح محمود احمد
مێژوە خوێناویەکەی قورئان و محمد
ڕۆژی 08/09/2017
کاتژمێر 22:00 ناوه‌ڕاستی ئه‌وروپا