شۆڕش شه‌ریف زاده‌: ڕۆژوو لەنێوان عەقڵ و نەقڵدا

ڕۆژوو لەنێوان عەقڵ و نەقڵدا

 

•          به‌شی (1)‌: دەقی پیرۆزكراوو بیرۆكه‌ی ڕۆژوو گرتن

•          به‌شی (2): هەوڵی موسوڵمانان بۆ بەموعجیزەكردنی ڕۆژوو

•          به‌شی (3): پێوەرو ماوەی ڕۆژووگرتن

 

ڕۆژوو لەنێوان عەقڵ و نەقڵدا (به‌شی 2)

•          هەوڵی موسوڵمانان بۆ بەموعجیزەكردنی ڕۆژوو:

ئەم ڕووەی لێكدانەوە بۆ ڕۆژوو زۆر جیاوازە لەوەی پێشتر، لێرەوە موسوڵمانان كارلەسەر ئەمڕۆ دەكەن و ئیمانیان بۆ بەشەكەی تر پتەودەكەن، ئێمە لەپێشتر وتمان ڕۆژوو كاری بت پەرستەكانیش بووە بەرلە هاتنی ئیسلام، وە لە ناوچە جیاجیاكانی تریش هەبووە، تەنانەت لای ئەوانەی ئیسلام بەشەیتان پەرست ناویان دەهێنێت ڕۆژوو هەیە، كەواتە ئەگەر بڕیاری ڕۆژوو گرتن دانایی بێت، ئەوە بتەكانیش قسەكانیان دەبێتە حیكمەت و موعجیزە وەك ئیسلام، ئەگەر پەیامی بتەكانیش هەڵەبێت، ئەوە ئیسلامیش یان وەك هەرئاینێكی تری سەر زەوی بەهەڵەدا ڕۆشتووە، یان الله ش خاڵی هاوبەشی هەیە لەگەڵ بتەكاندا.

لەم دواییانەدا موسوڵمانان سودی پزیشكی ڕۆژوویان كردۆتە بابەتێكی گرنگ بۆ پیرۆزتركردنی ئایین و بڕیارە ئایینییەكەیان، لە ماڵپەڕی یەكێتی زانایانی ئاینی ئیسلامی لە كوردستان، كۆمەلێك بەڵگەیان بەیان كردووە تا سودی ڕۆژوو وە مانگی ڕەمەزان نیشانی خەڵكی بدەن و تێیدا دەڵێن: ڕۆژووگرتن سودی بۆ ئەندامەكانی لەش هەیە وەك: (پێست، مێشك، جگەر، كلییە، ئێسك و جومگەكان، خوێن و دڵ)

 هەركەسێك ئەوە دەزانێت كە، هیچ شتێك نییە لایەنی باش و خراپی نەبێت، ڕۆژوو گرتنیش بۆ ئەمڕۆی مرۆڤایەتی هەروایە، تەنانەت ئایین كە لەمێژووی خۆیدا بووەتە هۆی لەبەریەك هەڵوەشاندنەوە و نانەوەی دوبەركی لەنێوان گەلاندا، ئەگەر عەقڵی تێدا بەسەر پیرۆزییە پەككەوتووەكاندا زاڵبكەین، دەتوانین بەسودی كۆمەڵگاكان تەواوی بكەین و ببێتە خۆشبەختی.

موسوڵمانان بەشێوەیەك باسی سودە پزیشكییەكان دەكەن كە، هەركەسێك وای دێتە پێش چاو ڕۆژووگرتن وەك ئەوەی سزادانێكی جەستەیی بێت و ئەم سزادانەش وەك باجێك بێت لەبەرامبەر ئەو 11 مانگەی كە لاڕێیمان كردووە لە خواردندا، بۆنموونە كاتێك دەوترێت سودێكی ڕۆژوو ئەوەیە كە چەوری زیادەی لەش لەناوبەرێت، ئەگەرچی لەم ڕوەشەوە ڕاست بێت، بەڵام ئەمە بەتەنیا كۆتای بە پرسەكە ناهێنێ‌، چونكە ئەمە هەر لەسەرەتاوە چارەسەرێكی ڕواڵەتییە، پێویستە بچینە ناو جەوهەری بابەتەكەوە، ئایا چەوری زیادە و خراپ لە چی دروست دەبێت تا بە خۆبرسی كردن قەرەبووی بكەینەوە؟ ئایا خۆراكێك نەبووەتە هۆی ئەم خراپ بوونەی لاشەی مرۆڤ؟ ئایا بە دیاری كردنی چەند جۆرێك خواردن و بەبێ‌ خۆبرسی كردن ناتوانین تەندروستی بۆ مرۆڤ دەستەبەربكەین؟ ئایا سەرچاوەی نەخۆشیەكانی مرۆڤ چین و ئیسلام دەستنیشانی كردوون؟ ئایا چارەسەری بنەڕەتی ئیسلام چییە بۆ گرفتەكانی تەندروستی مرۆڤ؟ ئایا ڕۆژوو دەتوانێت بەرگری لەبەرامبەر ئەم پرسیارە سادانەدا بكات؟ سیستمی خۆراكی مرۆڤ لە ئاینی ئیسلامدا ڕێك نەخراوە، یان بە خراپی و بێ‌ وردبوونەوە لە سروشتی مرۆڤ ڕێكخراوە، بەبێ‌ ئەوەی مرۆڤ خۆی برسی بكات تا بەشێوەیەكی كاتی خۆی لەو زیانانە ڕزگار بكات، دەتوانێت بەڕێكخستنی ڕژێمی خۆراكی ئەو زیانە لەلەشیدا بنەبڕبكات، لادانی ئەو خۆراكانەی لە سروشتی بەشەریدا نییە بەسە بۆ كۆتای هێنان بەم پرسە، لێرەشەوە ئیسلام دەكەوێتە بەر ئەو پرسەی بۆچی و چۆن بایەخی بە سیستەمی مرۆڤەكان نەداوە لە ناوەڕۆكدا و بەكارێكی ڕواڵەتییانە دایدەپۆشێت، هاوكات موسوڵمانانیش لەم ڕۆدا ئەم نەقڵە نالۆژیكییە بە موعجیزە وەسف بكەن. 

ڕێكخستنی ئەم سیستەمە نەك كاریگەری تەواو باشی دەبێت بۆسەر مرۆڤ، بەڵك و ژینگە و ئاوهەوا و خراپبوونی سروشتیش دەپارێزێت، لێرەوە كەمێك لە لایەنی خراپەكاری تەندروستی مرۆڤ بەراورد بە نارێكی سیستەمی خۆراكی دەكەم، كە ئیسلام پشتگیری لەخۆراكە ناسروشتی و نابوتكەرەكانی مرۆڤایەتی دەكات، تا بزانین بە ڕێكخستنی سیستمی خۆراكیمان چۆن دەتوانین خۆمان لەهەموو نابوتیەك دوربخەینەوە.

بێ‌ ئاگایی پەیامبەری ئیسلام سەبارەت بە مێژووی مرۆڤایەتی وای كردووە ئەوەی لەبیربچێت كە، مرۆڤ بەسروشتی خۆی گۆشتخۆر نەبوەو ئەوە هەل و مەرجی ژیان لە مێژوودا و لەكاتێكی دیاری كراودا ناچار بە خواردنی گۆشتی كردووە، هەرلەو ساتەوەی مرۆڤیش خۆی وابەستەی ئەم خواردنە كردووە، هەرچی لە خراپەكاری مرۆڤایەتی هەیە سەری هەڵداوە، هەرلە چینایەتی و پەراوێزخستنی ئافرەت تا بەربڵاوی ئایین و كوشتن و خراپبوونی سروشت و ئاوهەواو و دواجاریش سەرهەڵدانی نەخۆشییەكان، هەمووی دەستپێكی بۆ ئەو قۆناغەی مێژوو دەگەڕێتەوە، كە ئیسلام لێی بێخەبەرە.

سروشتی گیاندارە ڕوەكخۆر و گۆشتخۆرەكان زۆر خاڵی جیاوازیان هەیە، هەر ئەمەشە وای كردووە گۆشت بۆ سروشتی مرۆڤ نەگونجاوبێت، ڕژێنی گەدەی مرۆڤ، ناتوانێت وەكوو گۆشتخۆرەكان ئەو ئازۆتە زۆرەی كە لە گۆشتدا هەیە بگۆڕێت بۆ ئامۆنیا، ڕژێنەكانی گەدە و پەنكریاسی مرۆڤیش بە باشی گۆشت هەرس ناكات، جگەری مرۆڤ ناتوانێت ئازۆتی گۆشت پاڵنێت و دووریخاتەوە، ئەمەش دەبێتە هۆی نەخۆشیەكانی (أعصاب) و جومگە ئاوسان و ڕۆماتیزم.

هەروەها لە لایەكیتریشەوە ڕیخۆڵەی گۆشتخۆرەكان كورتە و گۆشتی گەنیو تیایدا ناوەستێت و نامێنێتەوە، درێژی ڕیخۆڵەكانی مرۆڤیش بەڵگەیەكیتری گۆشتخۆر نەبوونی مرۆڤە، چونكە ئەو گۆشتەی كە لە ناو ڕیخۆڵەكانی مرۆڤ دەمێنێتەوە، دەگەنێَت و میكرۆب گەلێكی كوشندە درووستدەكات و ئەمەش دەبێتە هۆی نەخۆشییەكانی دەزگای هەرس  و هەوكردنی ڕیخۆڵەكان، دكتۆر ( ڤیكتۆر پوشە ) دەڵێت:" ئێمە دەتوانین دڵنیابین لەوەی كە مرۆڤێكی ڕوەكخۆر هەرگیز تووشی نەخۆشی ڕیخۆڵەكوێرە نابێت و خواردنی گۆشت هۆكاری ئەو نەخۆشیەیە " هەروەها بونی ڕیخۆڵەكوێرە لە مرۆڤدا خۆی بەڵگەی گۆشت نەخۆرییەتی، چونكە گۆشتخۆرەكان ئەم ئەندامەیان نییە.

دكتۆر ( پاپوس ) دەڵێت "لەو كاتەوە كە جووتیارەكان دەستیانكرد بەوەی گۆشت بخۆن، نەخۆشی جومگەئاوسان و ڕۆماتیزم لە نێوانیاندا سەریهەڵدا "

دكتۆر ( لۆگران ) دەڵێت "ئێمە دەبێ‌ بزانین كە ئەو هەموو گۆشتە هی لاشەی مردووەكانە و ئێمەش لە ڕێگای گۆشتخۆری و بە ئارەزووی خۆمان، ڕێژەیەك لە ژەهری (تۆكسین) دەكەینە ناو لەشمانەوە"(17)

كەواتە ئێمە بەڕێكخستنی ڕێرەوی خۆراك، دەتوانین لەبنەڕەتدا خۆمان لە ژەهراوی بوون بپارێزین، موسوڵمانانیش پێیان وایە دوای ئەوەی لاشەمان ژەهراوی دەبێت، ڕۆژوو دەبێتە هۆكارێك بۆ وەدەرنانی ئەو ژەهرانە، كە ئەمەی موسوڵمانان بۆئەم مەبەستە چارەسەرێكی ڕواڵەتییە و مرۆڤ دیسانەوە دێتەوە بەردەم ژەهراوی بوونێكی تریش، چونكە ئایینی ئیسلام ڕەگی ئەم ژەهراوی بوونەی دەستنیشان نەكردووە.

دكتۆر ( ئێڵد فێڵد ) دوای ئەوەی بەزانستەكەی بۆمان دەسەلمێنێت كە گۆشت خۆراكی مرۆڤ نییە، دێتەسەرباسی سروشتی مرۆڤ و نەخۆشییەكانی و دەڵێت" گۆشت خۆراكێكی سرووشتی نیە و پشێوی و ئاڵۆزی لە لەشدا درووستدەكات، بە هەمانشێوە كە لە شارستانیەتی نوێ‌ و مۆدێرندا بەكاریدەهێنن و دەیخۆن، گۆشت دەبێتە هۆی نەخۆشی ترسناك  و كوشندە وەكوو: شێرپەنجە، سیل، تا، كرمی ڕیخۆڵە و ...هتد. هەروەها بە هیچ شێوەیەك جێی سەرسوڕمان نیە ئەگەر عادەتی گۆشتخۆری هۆكاری ئەو نەخۆشیانە بێت كە 99% خەڵكی دوچاری بونەتەوە"

ئەوانەی لەبارەی سیستمی خۆراكی مرۆڤەوە قسەیان كردووە و لێكۆڵینەوەیان كردووە سەدان كەسایەتی ناوداری جیهانین، هەرلە فیساگۆرس و ئەفلاتوونەوە بۆ ئەنشتاین و ڕۆسۆ و تا مێژوونوسی ناوداری وەك ویڵ دیورانت و تا پزیشكانی خاوەن ڕەوشت و زانایی سەردەم، هەریەكەو بەپێی زانستەكەی قسەیان لەسەر ئەم لاڕێییەی مرۆڤ كردووە لە خورادن و ئاكاریدا، كە سیستەمی خورادن هۆكارەكەیەتی.

ڕێكخستنی ئەم سیستەمە، كاری گەری بەسەر هەموو لایەنێكی ژیانەوە هەیە، تەنها لایەنی تەندروستی نییە(كە هەر خۆی ئەم لایەنە بەسە بۆ وەڵامدانەوەی موسوڵمانان) بەڵام پێویستە بزانین كە ئەو سیستەمە چی بەسەر مرۆڤی ئەمڕۆدا هێناوەكە ئیسلام نەك لەبیری كردووە بەڵك و پشتگیری لە پێچەوانەی ڕاستییەكە كردووە، بۆیە ئەگەر بەپێوەری عەقڵ لەسەر ئەم سودانەی ڕۆژوو بدوێین و بڕواشمان بەوە هەبێت سەرجەمیان ڕاستە، هێشتا ئەوە تەنها باجی هەڵەیەكی تری ئەم ئایینەیە كە، ڕێگای بۆ وەها خۆراكێكی نامرۆیی كردۆتەوە و مرۆڤی نەخۆش خستووە، نەك تەنها نەخۆشی جەستەیی بۆمرۆڤ هێناوە بگرە تەواوی ئەوەی ئەمڕۆ مرۆڤ بەدەستییەوە دەناڵێنێت كردەی بڕیاری ئەو ساتەی مرۆڤە گۆشت خواردنی تێدا حەڵاڵ و ڕەوا كردووە، جا ئەگەر بگەڕێینەوە سەر ئەو سودانەی موسوڵمانان ئاماژەیان بۆكردووە، دەبینین سەرجەمی ئەوەی بەسودی ڕۆژوو ناوی دەبرێت بۆ ئەو ئەندامانەی لەشی مرۆڤ، ئەگەر نیمچە ڕاستیەكیشی تێدا دەركەوێت، ئەوە ڕاستییەكی ڕەها لەوەدایە كە، چارەسەری ئیسلام بۆ ئەم پرسە ڕواڵەتییە و ئەگەر ئاینێكیش لەلایەن خوداوە بۆ سەرتاپای مرۆڤایەتی هاتووە، دەبوو لە جەوهەردا چارەسەری بۆ كێشەكانی مرۆڤ بدۆزیایەتەوە.

دكتۆر كامپبێڵ زیاتر لە 40 ساڵە سەبارەت بە سروشت و سیستەمی خۆراكی مرۆڤ توێژینەوە ئەنجام دەدات و بەووردی لێكۆڵینەوەی بۆ زۆربەی نەخۆشیە باوەكانی سەردەم كردووە، ئەو بەهەموو شێوەیەك نەخۆشی مرۆڤ دەبەستێتەوە بە سیستەمی خواردن و پێیوایە نەخۆشی پەیوەستە بە خواردنی گۆشت و بەروبوومی ئاژەڵییەوە، بڕواشی وایە بە ڕێكخستنی سیستەمی خۆراكیمان دەتوانین دەرگا لەسەر نەخۆشییەكان دابخەین.(18)

 ئایا ئیسلام پێویست بوو ئەم هەنگاوانە بنێت، یان پوكانەوەی لەشی مرۆڤ بەهۆی نەخواردنەوە؟

پڕۆفیسۆر ( بۆشار ) دەڵێت : (( گۆشتخۆرەكان زمانی چڵكن، هەناسەی بۆگەن و پاشەڕۆی پیس و بۆگەنیان هەیە، هەروەها نەخۆشیەكانی گەدە و ڕیخۆڵە، برینەكانی پێست، سەرئێشە، ڕۆماتیزم، قەڵەوی و لاوازیی لە ڕادەبەدەر لە نێوانیاندا دەبینرێت.))

كەسایەتییە تێگەیشتووەكان هەرزوو لەم ڕاستییە تێگەیشتن كە، سیستمی خوراكی مرۆڤ چەوتە و نەهامەتێكانی مرۆڤیش هەرلە ئاكار و تەندروستی و چارەنوسی سروشتیشی پێوەبەندە، ئەنشتاین دەڵێت: ئەگەر تەواوی دونیا لە خواردنی گۆشت دووركەوێتەوە و ببێـتە ڕوەكخۆر ئەوە دەتوانرێت چارەنوسی مرۆڤایەتی بگۆردرێت، ئەم سیستەمەی ڕوەكخۆری سروشتییە و كاریگەرییەكی زۆری لە سەرخود و سروشتی ئێمە هەیە و من بە بەبێ چەوری و بە بێ گۆشت و بە بەبێ ماسی دەژیم و هەستێكی زۆر باشیشم هەیە لەم رێگەیە، هەمیشە پێم وابووە بەم جۆرە بووە كە مرۆڤ بۆ ئەوە نەهاتوەتە دونیاوە كە گۆشت بخوات.

لەلایەكی ترەوە سیستەمی ناسروشتی خۆراكی مرۆڤ بەشێوەیەكە كە، هەندێك بەهۆی خراپی خۆراك و هەندێك بەهۆی ئەوەی بەشی ئەوانی تریش دەخوات و هەندێكیش بەهۆی برسێتیەوە گیان لەدەستدەدەن و ڕۆژلەدوای ڕۆژیش ئەمە زیاتر پەرەدەسێنێت.

لە هەر ڕۆژێكدا زیاتر لە 18000 منداڵ گیان لە دەست دەدات و بەگشتی رۆژانە زیاتر لە 25000 كەس لە جیهاندا بەهۆی برسیەتیەوە گیان لە دەست دەدەن و  ڕێژەكان ڕۆژبەڕۆژ ڕوولە زیادبونە.

بەڵام پێویستە بزانین هۆكاری مردنی ئەو كەسانە چیە و چۆن دەكریت ئەو كیشەیە چارە بكرێت، لەقورئاندا الله دەڵێت: وَلَا تَقْتُلُوا أَوْلَادَكُمْ خَشْيَةَ إِمْلَاقٍ نَحْنُ نَرْزُقُهُمْ وَإِيَّاكُمْ (19)

واتە" نەكەن منداڵەكانتان لە ترسی گرانی و برسێتی بكوژن، ئێمە ڕزق و ڕۆزی دەبەخشین بەوانیش و بە ئێوەش)) بەڵام ئەمە تەنها بەوتن نابێت، كام سیستەم لە ئیسلامدا هەیە بۆ ڕزگاری ئەو برسیانە؟ بەپێچەوانەوە ئیسلام خۆی هۆكارێكە بۆمردنیان، چونكە بەلانی كەم  هەندێك لەتوێژەران پێمان دەڵێن، ئەگەر سیستمی خۆراكیمان بگۆڕین و ڕێكی بخەین، ئەوكات دەتوانین هەنگاوی گرنگ بۆ ئەم پرسە هەڵبگرین، چونكە بۆ بە دەستهێنانی یەك كیلۆ گۆشت پێویستیمان بە 16 كیلۆ گەنم دەبێت (واتە تێچووی بەرهەمهێنانی یەك كیلۆ گۆشت یەكسانە بە 16 كیلۆ گەنم) جگەلەوەی مرۆڤ ئەگەر بەم كارە هەستا، لەنەخۆشییەكان بەڕێژەیەكی زۆر لەوەی موسوڵمانان لەڕۆژوودا باسی دەكەن دوردەكەوێتەوە و سروشت و ئاوهەوا دەپارێزێت، دواجار ئەم بڕە گەنمە زیاتر لە 20 كەس تێر دەكات و بەماوەیەكی لەسەرخۆ چ برسێتی و چ نەخۆشی ڕوو لەكەمیی بۆ نەمان دەچن بەشێوەیەكی بنەڕەتی، نەك ڕواڵەتی!

كەواتە ئەگەر موسوڵمانانی جیهان 1ملیارد كەس بن، هەموشیان گۆشتخۆربن (كە بەدەگمەن دەبینیت گۆشتخۆر نەبن، مەگەر لەبەر نەخۆشی، كە نەخۆشیەكەشی بەهۆی ناڕێكی سیستەمی خۆراكه‌وه‌یە!) ئەوكات ئیسلام دەبێتە بەشێكی گەورە لە نابوتكارییەكانی مرۆڤایەتی و زەوی، لەبەرئەوەی ئەم ئاییەنە هیچ بەرنامەیەكی بۆ سیستەمی خۆراكی پێ‌ نییە و لەسەر هەمان ڕێرەوی نامرۆڤایەتی هەنگاوی هەڵگرتووە، بۆیە دەبێت ئەوەمان لەبیر نەچێت كە، موسڵمانان پشكێكی زۆریان لەقوربانی مرۆڤە برسێكان بەردەكەوێت. ئەمە جگەلەوەی بۆخۆیان توشی نەخۆشی دەبن و لەو ڕێگەشەوە ئەو سامانەی لەئەنجامی نەخۆشییەكاندا خەرج دەكرێت، دەتوانرێت چارەنوسی هەژارانی پێ‌ ڕۆشن بكەینەوە.

ماوێتی

بۆ خوێندنه‌وه‌ی به‌شی یه‌که‌م ئێره‌ کلیک بکه‌

http://xwdakan.com/xwdakan/index.php/nuseran1/3151-0.html

پەراوێز:

17.       (فورائد گیاه خواری، ن. صادق هدایت، لا20-46)

18.       By:T.Colin CampbellThe China Study,

19.       (تەفسیری ئاسان، اسرا‌ء 31)

 

ڕێکه‌وتی بڵاوکردنه‌وه 2012-08-07 05:31:00
به‌شی ( شۆڕش شه‌ریف زاده‌ ) ئاماده‌کرد ( شۆڕش شه‌ریف زاده‌ )



ئەم, ڕووەی, لێكدانەوە, بۆ, ڕۆژوو, زۆر, جیاوازە, لەوەی, پێشتر, لێرەوە, موسوڵمانان, كارلەسەر, ئەمڕۆ, دەكەن, و, ئیمانیان, بۆ, بەشەكەی, تر, پتەودەكەن, ئێمە, لەپێشۆڕش, شه‌ریف, زاده‌شۆڕش, شه‌ریف, زاده‌, ڕۆژوو, لەنێوان, عەقڵ, و, نەقڵدا Tags





په‌خشی ده‌نگی ئازاد


مه‌ریوان هه‌له‌بجه‌یی
زنجیره‌ به‌رنامه‌ی ئاوێنه.
ڕۆژی 08/17/2017
کاتژمێر 21:00 ناوه‌ڕاستی ئه‌وروپا
فاتیح محمود احمد
فاتیح محمود احمد چیرۆکێکی تری محمد
ڕۆژی 08/11/2017
کاتژمێر 23:00 ناوه‌ڕاستی ئه‌وروپا
فاتیح محمود احمد
مێژوە خوێناویەکەی قورئان و محمد
ڕۆژی 08/09/2017
کاتژمێر 22:00 ناوه‌ڕاستی ئه‌وروپا